Presidenti rus, Vladimir Putin dhe presidenti i SHBA-së, Donald Trump diskutuan dje, në një bisedë telefonike, konfliktin në Siri dhe shpresat e tyre për t’u takuar për herë të parë në korrik, në Gjermani, njoftoi Kremlini dhe Shtëpia e Bardhë.
“Trump dhe Putin ranë dakord se vuajtjet në Siri kanë zgjatur shumë dhe se të gjitha partitë duhet të bëjnë të pamundurën për t’i dhënë fund dhunës”, tha Shtëpia e Bardhë duke detajuar një bisedë që përfshinte mundësinë e krijimit të zonave të sigurta.
“Marrëdhëniet SHBA-Rusi u përkeqësuan si rezultat i mbështetjes së Moskës ndaj regjimit sirian”, deklaroi Trump muajin e kaluar vetëm disa ditë pas një sulmi ajror të SHBA-së në përgjigje të një sulmi të dyshuar me lëndë kimike, që vrau dhjetëra civilë sirianë.
SHBA-ja tha se do të dërgonte një përfaqësues në bisedimet e armëpushimit, në Kazakistan, këtë javë.
Sipas Kremlinit, liderët thanë se shpresojnë të zhvillojnë takimin e tyre të parë lidhur me samitin e G20, më 7-8 korrik në qytetin gjerman të Hamburgut./b.d
