I izoluar në skenën ndërkombëtare, por “mik” i Francës, Donald Trump mori pjesë sot si i ftuar nderi në paradën tradicionale të 14 korrikut në Champs-Elyse përkrah presidentit, Macron, i cili do të marrë pjesë më pas në ceremoninë përkujtimore për atentatin që shkaktoi 86 të vdekur vitin e kaluar, në Nisë.
Parada, që përkon me 100-vjetorin e hyrjes së SHBA-së në Luftën e Parë Botërore, u hap nga “Sammies” me kostumet e asaj kohe, me 3 720 trupa tokësore, 211 automjete, 62 prej të cilëve motorë, 241 kuaj, 63 avionë dhe 29 helikopterë.
“Kjo është një festë kombëtare e mrekullueshme. Mezi presim pjesëmarrjen. Spektakolare!”, theksoi dje i entuziazmuar presidenti amerikan në një konferencë të përbashkët shtypi me Macron në pallatin presidencial të Elyse.
“Dy kombet tona janë të bashkuara, së bashku, përgjithmonë, me frymën e revolucionit dhe luftës për liri”, shtoi ai.
“Macron do të mbajë një fjalim të shkurtër në përfundim të paradës për të theksuar kuptimin e festës kombëtare, që do të jetë tashmë dhe dita përkujimore e një atentati që goditi Francën”, thekson rrethi i tij.
Kjo paradë zhvillohet në një klimë tensioni mes presidentit dhe ushtarëve që kanë shprehur pakënaqësitë e tyre përballë shkurtimeve buxhetore që do t’i prekin.
Parada në Champs-Elyses do të përfundojë rreth orës 10:30 GMT./b.d
