Partitë politike në Kosovë ende nuk kanë propozuar një kandidat për postin e Presidentit të Kosovës që do të ishte i pranueshëm për të paktën 80 deputetë dhe të kishte një votim të suksesshëm.
“Deri më tani presidentja aktuale Vjosa Osmani ka shprehur synimin për një tjetër mandat. Ndërsa akademiku Arsim Bajrami u ofrua si kandidat konsensual, dikur ish-pjesëtar i Partisë Demokratike të Kosovës. Të premten edhe Nisma Socialdemokrate propozoi Fatmir Limajn për postin e Presidentit të Kosovës. Që të tre ende nuk kanë marrë 30 firmat e deputetëve, të nevojshme për të zyrtarizuar kandidaturat.”
Fillimisht, pranë Kuvendit duhet të depozitohen dy kandidatura që kanë së paku nga 30 nënshkrime unike. Të njëjtët deputetë do të kërkojnë seancë të jashtëzakonshme për zgjedhjen e presidentit. Pa kandidatura zyrtare nuk do të ketë seancë të Kuvendit.
“Dy kandidatë që i kanë 30 nënshkrime, me kusht që deputetët e caktuar të mos jenë në të dyja këto lista, dhe fillon procedura për zgjedhjen e Presidentit të Kosovës. Në rastin kur nuk ka propozime, seanca e Kuvendit nuk thirret, as nga kryetarja e Kuvendit, as nga Kryesia e Kuvendit”, tha Naim Jakaj nga Instituti i Kosovës për Drejtësi.
Sipas interpretimeve të juristëve, vendi nuk shkon në zgjedhje në rast se nuk ka një emër që do të hidhet në votim. Ky përbën një zhvillim të ri, pasi ngërçi duket te mungesa e pasojave në rast se presidenti nuk zgjidhet brenda afatit 30-ditor deri në përfundim të mandatit, në mungesë të një kandidati zyrtar.
“Interpretimi ynë është që nuk shkojmë në zgjedhje në mënyrë automatike, për arsye se as në Kushtetutë, as në ligj dhe as në Rregulloren e Kuvendit nuk shkruan për pasojat e moszgjedhjes së presidentit brenda afatit që thuhet 30 ditë para skadimit të mandatit të presidentes aktuale.”
Duket se çështja e zgjedhjes së presidentit mund të përfundojë në Gjykatën Kushtetuese, në rast se nuk ka asnjë kandidat.
“Sërish duhet t’i drejtohemi Gjykatës Kushtetuese për shkak të paaftësisë së pushtetit politik, në këtë rast shumicës parlamentare fillimisht e më pas edhe opozitës parlamentare, që nuk kanë gjetur një kandidat konsensual, sepse fryma e Kushtetutës thotë që për kryetarin e Kuvendit, Kryesinë dhe për presidentin e vendit duhet gjetur konsensus.”
Nëse nuk ka kandidatura deri më 5 mars, presidentja aktuale Vjosa Osmani vazhdon mandatin deri më 4 prill dhe pas kësaj date ajo duhet të lirojë zyrën. Kryetarja e Kuvendit, Albulena Haxhiu, bëhet ushtruese e detyrës së presidentit për një afat prej 6 muajsh.
Kryeministri Albin Kurti ditë më parë takoi liderët e PDK-së dhe LDK-së në përpjekje për të gjetur një zgjidhje. Takimet me Bedri Hamzan dhe Lumir Abdixhikun nuk sollën asnjë rezultat. Edhe propozimi që të ishte një kandidat nga familja Adem Jashari u hodh poshtë, pasi nuk u pranua një gjë e tillë.
