Presidenti i sapozgjedhur i SHBA-ve, Donald Trump ka njoftuar se miliarderi Elon Musk dhe Vivek Ramaswamy (ish-kandidat presidencial dhe aleat i Trump) do të drejtojnë një Departamenti të ri të Efikasitetit të Qeverisë (Doge).
“Së bashku, këta dy amerikanë të mrekullueshëm do t’i hapin rrugën administratës sime për të çmontuar burokracinë qeveritare, për të ulur rregulloret e tepërta, për të shkurtuar shpenzimet e kota dhe për të ristrukturuar agjencitë federale,” tha Trump në një deklaratë të martën.
Departamenti i Efikasitetit të Qeverisë nuk do të jetë një agjenci federale në qeverinë amerikane, por do të ofrojë këshilla dhe udhëzime “jashtë qeverisë” dhe do të jetë partnere me Shtëpinë e Bardhë dhe Zyrën e Menaxhimit dhe Buxhetit për të “drejtuar reformën strukturore të qeverisë”.
Presidenti i zgjedhur nuk dha detaje se si do të financohej departamenti i ri.
“Mezi pres që Elon dhe Vivek të bëjnë ndryshime në Burokracinë Federale me një sy te efikasiteti dhe, në të njëjtën kohë, ta bëjnë jetën më të mirë për të gjithë amerikanët”, shtoi Trump.
Musk reagoi ndaj emërimit, duke thënë se një komponent kyç i departamentit do të ishte transparenca me publikun.
“Të gjitha veprimet e Departamentit të Efiçencës së Qeverisë do të postohen në internet për transparencë maksimale. Sa herë që publiku mendon se ne po shkurtojmë diçka të rëndësishme ose nuk po shkurtojmë diçka të kotë, thjesht na njoftoni,” tha Musk.
Ky i fundit shtoi se do të kishte një “leaderboard” publik për të gjurmuar shpenzimet e dollarëve të taksave.
“Ne do të kemi gjithashtu një tabelë drejtuese për shpenzimet më të çmendura të dollarëve të taksave tuaja. Kjo do të jetë jashtëzakonisht tragjike dhe jashtëzakonisht argëtuese,” tha Musk.
/a.r
