Presidenti i Shteteve të Bashkuara, Donald Trump, deklaroi se armëpushimi mes SHBA-së dhe Iranit ka përfunduar, duke hedhur poshtë mundësinë e vazhdimit të dialogut me Teheranin.
Duke folur në Samitin e NATO-s, Trump u shpreh se nuk dëshiron të merret më me udhëheqjen iraniane, të cilën e cilësoi si “njerëz të sëmurë dhe të egër”.
“Nuk dua të merrem më me ta. Ata janë llum. Janë njerëz të sëmurë, të udhëhequr nga njerëz të sëmurë. Janë të egër dhe të dhunshëm. Nëse do të kishin armë bërthamore, do t’i përdornin. Për sa më përket mua, kjo çështje ka mbaruar”, deklaroi Trump.
Presidenti amerikan shtoi se negociatorët mund të vazhdojnë bisedimet nëse dëshirojnë, por sipas tij ato nuk do të sjellin rezultate.
“Ata mund të flasin, por mendoj se po humbasin kohën e tyre. Sinqerisht, nuk dua të humbas kohën time me ta. Do t’i lë negociatorët tanë të vazhdojnë nëse duan, por unë nuk e shoh të nevojshme”, u shpreh ai.
Në deklaratat e tij, Trump e cilësoi regjimin iranian si “të keq” dhe “të çmendur”, duke përsëritur se Shtetet e Bashkuara nuk do të lejojnë që Irani të pajiset me armë bërthamore.
“Këta janë njerëz të këqij. Ata janë një kancer dhe kanceri duhet të hiqet sa më herët”, tha presidenti amerikan.
Deklaratat e Trump vijnë në një kohë tensionesh të larta mes dy vendeve. Sipas Komandës Qendrore të SHBA-së (CENTCOM), forcat amerikane goditën më shumë se 80 objektiva iraniane, përfshirë mbi 60 mjete të vogla detare të Gardës Revolucionare Islamike.
Nga ana tjetër, Irani njoftoi se kishte shënjestruar objekte ushtarake amerikane në Bahrein dhe Kuvajt, duke rritur frikën për një përshkallëzim të mëtejshëm të konfliktit në Lindjen e Mesme.
