Prej vitit 1978 triporti në Vlorë, i njohur si porti i peshkimit, ka shumë vite që nuk njeh asnjë investim. Problem për peshkatarët që e kanë të lidhur jetën me këtë vend mbetet mungesa e një kantieri për riparimin e anijeve. Kapaciteti është për një flotë prej 80 peshkarexhash, pot sot funksionojnë vetëm 20 të tilla.
“Çdo gjë e përballojmë vetë, riparime, rrjeta, çdo gjë. Është profesion goxha i lodhshëm që nuk bëhet pa lekë në xhep.”
Po ashtu shumë anije të mbytura qëndrojnë në ujë, duke rrezikuar peshkarexhat e tjera.
“Janë disa anija të mbytura këtu që të bllokojnë, se as nuk futen as nuk dalin dot anijet e mëdha, ndërkohë kur ke për shkarkuar , të bllokohet puna.”
Problem për peshkatarët mbetet edhe çmimi i naftës.
“Nafta ka shkuar 1200 lekë, unë kam dhe anije dhe dyqan, janë shumë kosto.”
Ndërkohë pranë triportit prej një viti e gjysmë është ndërtuar një merkato, treg për magazinimin e peshkut, merkato e cila edhe pse u inaugurua rreth një viti e gjysmë më parë nuk është vënë asnjë ditë në punë.
“Nuk e dimë për çfarë rri ajo si hapësirë, ka nisur të zërë lagështi prapë, ndërkohë që ne na duhen hapësira magazinimi.”
Mosha mesatare e peshkatarëve është 60 vjeç e ata thonë se shumë pak të rinj kanë interes të ndjekin këtë profesion.
/f.s
