Nga Mero Baze
E para ka të bëjë me meshën e parë të kryepeshkopit Janullatos, si shtetas shqiptar. Ky ishte një lajm i mirë, pasi kryepeshkopi Anastas mban mbi supe jo vetëm peshën e kryqit që drejton kryemeshat për ortodokësit shqiptarë, por dhe gjithë marrëzitë e raporteve shqiptaro-greke, që janë me tepricë nga të dy palët.
Si e tillë, dhënia e shtetësisë është më shumë një akt paqeje me Greqinë, se sa ndonjë nder që i bëhet kryepeshkopit, pasi letrat janë detyrim për çdo shtetas të huaj që rri më shumë se pesë vite në Shqipëri.
Dhe si i tillë, ky lajm vlen pikërisht për këtë gjë, për të theksuar rëndësinë e raporteve më të paqta me Greqinë. Dhe nuk është rasti as të kryqëzohet Ilir Meta, dhe as të heroizohet, edhe pse ai po e paraqet si vepër individuale të tij. Nuk bëhet fjalë thjesht për shtetësinë e kryepeshkopit të firmosur në Presidencë, por për një proces të nisur në Kretë. Dhe ky është lajm i mirë.
***
E dyta ka të bëjë me përpjekjen për të bërë politikë me një vdekje tragjike të një të riu shqiptar në një burg në Francë. Barbaritë e burgjeve ordinere në Perëndim mund të prodhojnë sa të duash skena të tilla ndaj çdo shtetasi. Mund të ndodhë dhe në burgjet tona.
Por ideja se qeveria shqiptare është përgjegjëse për atë tragjedi, e fyen dhe vdekjen e djaloshit.
Ai mund të ketë ikur vërtet nga varfëria dhe pamundësitë e këtushme, por ideja se po të ishte Tritan Shehu në pushtet, kjo nuk do të ndodhte, e bën komike këtë tragjedi. Lereni në fatin e tij të zi.
***
Gjykata Speciale në Kosovë, e cila pritet të nisë punën në vitin që vjen, i bëri një gjyq paraprak politikës shqiptare në Kosovë, pasi provoi se çfarë presin ata në të vërtetë prej saj.
Përpjekja për ta shfuqizuar ligjin për Gjykatën Speciale, e cila u ndal pas kërcënimeve ekstreme të ndërkombëtarëve, është seanca e parë gjyqësore kolektive që ju bë klasës politikë në Kosovë.
Në atë seancë parlamentare, në të vërtetë u gjykua frika e politikës së Kosovës nga ndëshkueshmëria dhe mentaliteti anti-perëndimor që ata kanë për sistemin e drejtësisë.
Nuk dihet se kë do të dënojë individualisht gjykata, por kolektivisht ajo ka gjykuar dhe ka bërë publik ata që presin të ndëshkohen prej saj.
