Maqedonia ka reaguar rreth deklaratave të kryeministrit shqiptar i cili dy ditë më parë deklaroi se kjo Maqedoni e pajtueshme nuk mund të jetë pjesë e NATO-s. Për herë të parë Shqipëria reagoi ashpër ndaj fqinjit lindor, ndërsa kjo ka vënë në lëvizje Shkupin zyrtar.
Përmes një deklarate, Ministria e Punëve të Jashtme është justifikuar me faktin se një veto e mundshme e Shqipërisë për anëtarësimin e Maqedonisë në NATO, nuk do t’i shërbente frymës evropiane dhe bashkëjetesës.
“Qëllimi strategjik i Republikës së Maqedonisë është që të integrohet në NATO dhe BE. Kjo është në interes të të gjithë qytetarëve. Të gjitha bllokadat, kërcënimet dhe deklaratat për ofrimin e pretekseve kundër anëtarësimit tonë, nuk janë në frymën e vlerave evropiane dhe nuk kontribuojnë për paqe dhe stabilitet ne rajon” – thuhet në deklaratë.
Maqedonia ka qenë nën akuzë të vazhdueshme nga Shqipëria dhe vetë shqiptarët që jetojnë në vendin fqinj, se nuk po zbaton Marrëveshjen e Ohrit. Kjo e fundit u përmend edhe si kusht nga kryeministri Rama dhe ndërkombëtarët.
