Izraeli ka paralajmëruar përshkallëzim të madh të operacioneve ushtarake në jug të Libanit, duke kërcënuar shkatërrimin e fshatrave përgjatë kufirit dhe ndërprerjen e infrastrukturës strategjike, përfshirë urat mbi lumin Litani River.
Ministri izraelit i Mbrojtjes, Israel Katz, tha se veprimet do të jenë të ngjashme me operacionet në Rafah dhe Beit Hanoun në Gaza, duke sinjalizuar shkatërrime në shkallë të gjerë, raportojnë mediat e huaja.
Pak pas deklaratës, avionët izraelitë bombarduan urën e Qasmiyes, një nyje kyçe që lidh qytetet Tyre dhe Sidon, duke e bërë thuajse të pamundur qarkullimin në atë aks rrugor. Një sulm i dytë më vonë e përkeqësoi më tej situatën.
Presidenti libanez Joseph Aoun i dënoi sulmet si shkelje të sovranitetit dhe paralajmëroi për rrezik përshkallëzimi, duke i bërë thirrje OKB-së dhe Këshillit të Sigurimit të ndërhyjnë. Ndërkohë, ushtria izraelite bëri të ditur se po përgatit intensifikimin e operacioneve tokësore në territorin libanez.
Gjatë ditës, janë raportuar luftime të ashpra mes ushtrisë izraelite dhe Hezbollah në disa zona kufitare si Khiam dhe Taybé, me sulme të ndërsjella me raketa, artileri dhe dronë. Hezbollahu ka marrë përgjegjësinë për disa sulme ndaj forcave izraelite, ndërsa Izraeli ka vijuar bombardimet ajrore në jug të Libanit, duke shkaktuar viktima dhe dëme të shumta në disa rajone, përfshirë edhe zonën e Nabatiyës.
Ushtria izraelite gjithashtu ka njoftuar eliminimin e disa komandantëve të Hezbollah dhe një zyrtari të lartë të Hamas, ndërsa situata në kufirin Liban–Izrael mbetet e tensionuar dhe me përshkallëzim të vazhdueshëm.
