SPECIALE JAVANEWS/ Ditët e fundit gjithnjë e më shumë po gjallëron një skemë mjaft interesante, e cila ka të bëjë me faktin e krijimit të një tregut të “shitblerjes” së partive të vogla dhe in-ekzistente, por që janë të regjistruara në Gjykatë. Individë të caktuar që duan të hyjnë në politikë, ose që janë në politik deri dhe në nivel parlamentar, gjithnjë e më shumë mësohet se po shfaqin interes për të bërë të tyre këto parti. Precedent i Partisë Agrare, ku një deputet vihet në krye të kësaj partie pa qenë anëtar i saj qoftë dhe për një ditë të vetme, ka bërë që jo pak figura politike në Kuvend, të cilët e shohin se mund të mos jenë më në listat për deputet, i kanë kthyer sytë nga këto parti, qoftë dhe in- ekzistente sa i përket aktivitetit politik, por që rezultojnë të regjistruara në Gjykatë. Përpos tyre janë dhe një numër jo i vogël individësh, të cilët dëshërojnë të provojnë fatin në zgjedhjet e ardhshme parlamentare, duke mos garuar si kandidat të pavarur, por si kryetar partish.
Kleçkat ligjore
Po pse ky zgjim i papritur interesi për parti politike deri dje fantazëm? Arësyet janë të thjeshta. Ato kanë të bëjnë me çështje të karakteri ligjor. Në vitin 2009, me hartimin e Kodit të ri Zgjedhor, dy partitë e mëdha i dhanë fund praktikës, sipas të cilës, kalimi i një mandati parlamentar tek një parti e re politike, automatikisht sillte regjistrimin e saj në gjedhje. Kjo praktikë më shumë se 15 vjeçare solli si pasojë copëzimin e partive të mëdha dhe krijimin e një zinxhiri partish të vogla. Duke parë këtë spirale, PD dhe PS, në vitin 2009, ndryshuan “Ligjin për Zgjedhjet”. Këto ndryshime e bëjnë thuajse të pamundur krijimin e një subjekti të ri politik edhe sikur të gjithë deputetët e Kuvendit ta dëshërojnë. Ata duhet të mbledhin minimumi 3 mijë firma për të krijuar partinë e re dhe një shumëfish më të madh firmash për ta regjistruar atë në zgjedhje. Pra siç shihet s’ja leverdis fare që t’i hysh aventurës për të krijuar një parti të re, pasi është thuajse e pamundur ta regjistrosh atë si subjekt elektoral në zgjedhje.
“Zgjidhja magjike”
Po cila është zgjidhja magjike? Thjeshtë blerja e partive të vogla, deri dhe “fantazëm”, por që janë të regjistruara në Gjykatë. Automatikisht kjo mundëson hyrjen në zgjedhje, si dhe të ul në tryezë me dy partitë e mëdha për të krijuar koalicion në rastin e zgjedhjeve parlamentare apo lokale, pa pasur fare nevojë për të mbledhur firma lart e poshtë për t’u regjistruar fillimisht si subjekt e më pas për të hyrë në zgjedhje. Është pikërisht zbulimi i kësaj kleçke ajo që ka bërë që shumë individë, por dhe personazhe politik qoftë dhe në Kuvend, që të kthejnë sytë nga këto parti, për t’i shpluhurosur e më pas për t’i përdorur në situata elektorale, në kushtet që mund të mbeten jashtë listave të kandidatëve për deputet. Kjo ka nxitur edhe tregun më të ri të “shit-blerjeve” të partive, ku kryetarët që kanë vulën në xhep të kontaktojnë me jo pak individë apo politikan duke u ofruar partinë, por dhe bazën mbështetëse që ata pretendojnë se kanë. E njëjta logjik u ndoq edhe me Partinë Agrare. Ky precedent më shumëe se shtimi i alternativave të reja në skenën politike shqiptare thjeshtë pritet të shtojë kërkesën dhe ofertën në këtë treg të sapozbuluar.
(javanews.al) Me. Ar