Policia e Tiranës ka finalizuar me sukses operacionin e koduar “Heliks”, duke goditur një grup kriminal që merrej me shitjen e armëve të zjarrit. Si rezultat, u arrestuan dy persona, ndërsa dy të tjerë u shpallën në kërkim.
Të arrestuarit janë F. K., 18 vjeç dhe E. K., 49 vjeç, banues në Tiranë. Ndërkohë, vijon puna për kapjen e F. A., 28 vjeç dhe E. Z., 28 vjeç, të cilët janë shpallur në kërkim.
Hetimet kanë zbuluar se ky grup vepronte në Tiranë, Fushë Krujë dhe Thumanë, duke tregtuar armë zjarri. Gjatë operacionit, Policia sekuestroi tre kallashnikovë, dy pistoleta dhe sasi municioni luftarak, të cilat dyshohet se do të shiteshin në Tiranë dhe Krujë.
Operacioni u krye nga Seksioni për Hetimin e Trafiqeve të Paligjshme dhe Forca Operacionale e DVP Tiranë, nën drejtimin e Prokurorisë. Hetimet vijojnë për të zbuluar persona të tjerë të përfshirë në këtë aktivitet kriminal, ndërsa materialet procedurale i kaluan Prokurorisë për veprime të mëtejshme.
