Ligji i vetingut shumë shpejt pritet që të prekë emrat e parë të sistemit të drejtësisë. Të shtunën, PS-PD-LSI votuan unanimisht 27 anëtarët e dy organeve të vetingut, duke i hapur rrugë procesit të pastrimit të drejtësisë.
Gjatë kësaj jave pritet që të konstituohen Komisioni i Kualifikimit dhe Kolegji i Apelimit, ndërsa më pas do nisë dhe tërmeti në radhët e drejtësisë. Por kush do jenë të parët që do kalojnë në skanerin e vetingut?
Puna do të nisë me tre emrat më të rëndësishëm: Kryeprokurorin Adriatik Llalla, kreun e Gjykatës së Lartë, Xhezair Zaganjori dhe me kreun e Gjykatës Kushtetuese, Bashkim Dedja. Ligji ka një përcaktim që prioritet duhet t’u jepet krerëve të institucioneve.
Pranë Inspektoratit të Lartë të Deklarimit dhe Kontrollit të Pasurisë u bë e ditur per ‘sot’ se sapo të bëhet konstituimi i komisioneve menjëherë do hapen deklaratat e kupolës së drejtësisë dhe paralelisht me ta do fillojnë verifikimit.
Sipas burimeve nga ky institucion, deri më tani nuk është bërë asnjë verifikim sepse po pritej ngritja e dy organeve. Por tani që organet u ngritën u hap rruga për të spastruar drejtësisë.
Pra brenda javës pritet që dosja e parë që të hapet, të jetë ajo e kryeprokurorit Adriatik Llalla, ku do verifikohen të gjithë deklarimet që ai ka bërë, bashkë me pasuritë e familjarëve të tyre.
ILDKP ka gati një numër të lartë inspektorësh që do të zbresin në terren për të verifikuar nga afër çdo objekt dhe duke përcaktuar vlerën e gjithsecilit.
Më pas do vijohet me kreun e Gjykatës së Lartë, kreun e Gjykatës Kushtetuese, kreun e Gjykatës së Krimeve të Rënda, Sandër Simoni, kreun e Prokurorisë së Tiranës, Petrit Fusha dhe me krerët e gjykatave dhe prokurorive të rretheve, përfshirë dhe Gjykatën Administrative
. Pra të parët që do verifikohen janë drejtuesit e sistemit të drejtësisë dhe më pas do vijohet me gjyqtarët dhe prokurorët e thjeshtë, ku fokusi kryesor është Tirana.
Të gjithë pjestaret e sistemit të drejtësisë do i nënshtrohen një kontrolli rigoroz, nga kontrolli i llogarive bankare, te të ardhurat e çdo familjari e deri te pasuritë e paluajtshme.
Në lëvizje do vihet edhe drejtoria e Pastrimit të Parave, e cila do zhvillojë kontrolle brenda dhe jashtë vendit për çdo transfertë bankare të bërë nga njerëzit e drejtësisë.
Por paralelisht me ILDKP, verifikime do kryhen dhe nga Drejtoria e Sigurimit të Informacionit të Klasifikuar, sa i takon pastërtisë së figurës. Për të gjithë do kontrollohet nëse kanë pasur apo jo lidhje me njerëz me rekorde kriminale.
Ndërkohë, në fund do ketë verifikime nëse gjyqtarët dhe prokurorët e kanë kryer si duhet punën dhe kanë formim të mjaftueshëm, duke kontrolluar vendimet dhe procesverbalet.
Në fund secili institucion do i dërgojë Komisionit të Kualifikimit një raport për secilin emër. Interesant është fakti se për ta do bëhet një përllogaritje e vlerës së pasurisë dhe ajo do shihet nëse u korrespondon të ardhurve gjatë këtyre viteve.
Nëse dikush ka më shumë pasuri se shuma e të gjithë të ardhurve familjare, atëherë gjyqtari apo prokurori largohet. ONM pritet të angazhojë ekspertët e saj që të bëjnë verifikime edhe jashtë shtetit.
Për këtë arsye, sapo të nisë punën Komisioni i Kualifikimit pritet që të jepen dhe efektet e para, ku në korrik parashikohet që të nisin dhe largimet. Megjithatë, gjithçka mbetet në vullnetin e anëtarëve të zgjedhur me 100 vota të shtunën në Parlament. /b.d
