Tre persona me precedentë penalë dyshohen të jenë autorë të masakrës së ndodhur mbrëmjen e së mërkurës së kaluar në Elbasan, shkruan Gazeta Shqiptare. Burime nga policia dhe prokuroria e qytetit bënë me dije se gjatë kontrolleve të kryera banesë më banesë nga RENEA tre persona të dyshuar nuk janë gjendur në shtëpitë e tyre. Ndërkohë, pohohet se dyshimi në autorësinë e sulmit me armë të këtyre personave (emrat e të cilëve nuk bëhen të ditur) ndaj pjesëtarëve të fisit Çapja dhe të afërmve të këtyre të fundit, bazohet dhe në faktin se ata janë larguar menjëherë nga Shqipëria.
Ky dyshim mbetet për t’u verifikuar gjatë ditëve në vijim, pasi deri tani nuk ka prova konkrete që i implikon direkt në ngjarjen e përgjakshme ku mbetën të vrarë: 50-vjeçari Agron Çapja, nipi i tij 27-vjeçar, Ardit Sinakoli dhe miku i tyre 38-vjeçar Eno Bedalli. U plagosën rëndë: Fejzulla Çapja 58 vjeç, Ferit Muça 42 vjeç, Luan Muça 47 vjeç, Bujar Rreshka 40 vjeç, Florenc Çapja 35 vjeç, Erdis Sulku 33 vjeç si dhe Arnold Çapja 23 vjeç.
