Vettingu i prokurores së Tiranës, Elisabeta Imeraj shkaktoi debate e përplasje të forta mes saj dhe vëzhguesit të ONM, Theo Jacobs, i cili kërkon shkarkimin e prokurores. Pas përplasjeve ishin 3 gjyqtarët Olsi Komici, Roland Ilia, Suela Zhegu që gjykuan Imeraj, që reaguar ashpër ndaj deklaratave të Jacobs duke i dërguar një letër kreut të KPK se vëzhguesi i ONM ka bërë ndërhyrje jashtë kompetencave dhe ka dashur të influencojë në vendimmarrje.
Pas këtyre situatave është detyruar të reagojë vetë Komisioni i Pavarur i Kualifikimit (KPK) ku shpreh se mes këtij institucioni dhe Operacionit Ndërkombëtar të Monitorimit (ONM) ka pasur dhe vijon të ketë një bashkëpunim të frytshme në lidhje me procesin e vettingut.
KPK shkruan se vlerëson çdo rekomandim dhe opinion të vëzhguesve ndërkombëtar duke e konsideruar të rëndësishëm rolin e tyre në garantimin e një vettingu të drejtë.
“Komisioni i Pavarur i Kualifikimit duke marrë shkas nga disa lajme që janë publikuar ditët e fundit në media, dëshiron të sqarojë opinionin publik se, që prej konstituimit të tij në qershor të vitit 2017, ka pasur dhe vazhdon të ketë bashkëpunim të frytshëm me Operacionin Ndërkombëtar të Monitorimit, për të përmbushur misionin kushtetues të procesit të rivlerësimit në zbatim të ligjit nr. 84/2016 dhe në respektim të plotë të kuadrit procedural dhe kërkesave institucionale.
Për këtë qëllim, Komisioni ka vlerësuar dhe çmuar çdo rekomandim dhe opinion të vëzhguesve ndërkombëtarë, duke e konsideruar të rëndësishëm rolin e tyre kushtetues, në garantimin e një procesi rivlerësimi të drejtë e të pavarur, në funksion të rikthimit të besimit të publikut te organet e reja të drejtësisë. Komisioni i Pavarur i Kualifikimit mbetet i angazhuar për të ushtruar me paanshmëri, profesionalizëm dhe pavarësi detyrat dhe funksionet e ngarkuara me ligj, për të kryer këtë proces të rëndësishëm dhe historik për vendin”, thuhet në njoftimin e KPK.
