Tre persona janë proceduar penalisht dhe një 19-vjeçar është shpallur në kërkim pas masave të sigurisë të ndërmarra nga Policia gjatë derbit të futbollit mes “Partizanit” dhe “KF Tiranës”, që u zhvillua pasditen e djeshme në stadiumin “Air Albania”.
Sipas njoftimit të Policisë, një 25-vjeçar është proceduar penalisht pasi është konfliktuar me një 19-vjeçar pranë stadiumit, para fillimit të ndeshjes.
Gjithashtu, janë proceduar penalisht dy të mitur, të cilëve gjatë kontrollit fizik iu gjetën kapsolla dhe flakadanë, të sekuestruar në cilësinë e provës materiale.
Ndërkohë, Policia ka identifikuar dhe shpallur në kërkim një 19-vjeçar, i cili dyshohet se ka hedhur një kapsollë në fushën e lojës gjatë zhvillimit të ndeshjes.
Kontrollet dhe monitorimi i lëvizjeve të tifozëve u kryen në kuadër të masave të marra për garantimin e rendit dhe sigurisë publike para, gjatë dhe pas zhvillimit të takimit sportiv.
Materialet procedurale për rastet e konstatuara i janë referuar Prokurorisë për veprime të mëtejshme.
