Nga Eduard Zaloshnja
Transparenca e KQZ-së ka qenë shembullore deri në përfundimin e regjistrimit të zgjedhësve emigrantë që duan të votojnë me postë nga jashtë vendit. Në çdo çast kushdo mund të futej në faqen e internetit të KQZ-së dhe të shikonte se sa emigrantë kishin bërë kërkesë dhe save u ishte miratuar kërkesa (sipas shtetit ku banonin apo qarkut ku mund të votonin). Pothuaj 246 mijë u regjistruan si përfundim, nga rreth 1.8 milionë zgjedhës që janë në emigracion.
Faza e dytë është dërgimi me postë i fletëvotimeve në adresat e atyre 246 mijëve që janë regjistruar për të votuar. KQZ-ja duhet ta bëjë transaparente marrjen e fletëvotimeve nga emigrantët sipas shteteve ku banojnë zgjedhesit e regjistruar në emigracion, sepse kompania private postare që do të marrë përsipër shpërndarjen e ka mundësinë dixhitale të regjistrimit të këtyre të dhënave.
Faza e tretë (më e rëndësishmja) është ajo e marrjes në dorëzim në KQZ të zarfeve me fletëvotime, që do të dërgojnë emigrantët. (Sipas një vlerësimi të përafërt statistikor, rreth 200 mijë nga 246 mijë emigrantë të regjistruar gjithsej).
Shumë para 11 majit, KQZ-ja duhet të krijojë një faqe të veçantë në internet ku çdokush mund të shikojë në çdo çast para 11 majit se sa zarfe me fletëvotimi kanë ardhur nga emigrantët, sipas shtetit ku banojnë apo qarkut ku e hedhin votën e tyre. Përndryshe, teoritë konspiracioniste do të gëlojnë pas 11 majit…
