Emri i Anxhelës, tranvestitit shqiptar, është lakuar shpesh , kohet e fundit, për tentativat e saj për vetvrasje. Pasi tentoi të digjte veten para Parlamentit, Anxhela u përpiq të vrasë veten këto ditë, në një qendër sociale.
Më parë u publikua një video, ku shihej Anxhela teksa kërcente në kete qendër, ku ashtu si të tjerët u strehua, kete jave ngricash. Në një interviste për dritare.net, Anxhela rrëfen arsyen përse vendosi të kryej përsëri vetvrasje, duke thënë se u ndje e paragjykuar dhe e ofenduan.
“Edhe pse drejtoresha e qendrës sociale i paralajmëroi të gjithë që të mos më ngacmonin apo ofendonin, unë përsëri u përballa me reagime negative.
Vajzat e stafit vendosën të argëtoheshim dhe vune muzikë. Mua më pëlqen shumë të kërcej, e për këtë arsye u ngrita. Nuk e dija që ata djemtë po më filmonin, thjesht po shijoja muzikën. Të rinjtë rreth moshës 20 vjeçare më hidhnin komente, në fillim i injoroja ngacmimet e tyre.
Por më pas, një nga djemtë nisi të më ofendonte rëndë, mbi të gjitha më vodhën edhe portofolin, ku kisha katër mijë lek të vjetra. Unë jam lodhur tashmë me këto gjëra dhe u nervozova shumë, nuk dua të lëndoj të tjerët dhe zgjedh t’i bëj dëme vetes. Për këtë arsye mora një brisk, shkova në tualet dhe atje fillova të prisja veten ne krahë dhe në qafë. Duke qenë se isha pa ngrënë, humba ndjenjat dhe më përmenden punonjëset e qendrës deri sa vjen ambulanca. Në spital më mjekuan, nuk qëndrova shumë se doktorët thanë që nuk kisha dëmtime të mëdha fizike, por që vuaja nga depresioni.”
Anxhela, jetonte në ambjentet pranë Parlamentit, në qiell të hapur, sëbashku me një grua të moshuar të verbër. Por me temperaturat në minus dhe pastaj bora, e kishin të pamundur të mbijetonin në rrugë. Për këtë arsye policia i shoqëroi në qëndrat sociale, si shumë të pastrehë, si ato.
“Mua dhe nënë Fatimen erdhën policët e rendit që na morën e na drejtuan në qendër, ku mund të rrimë deri sa të kalojë gjëndja emergjente. Por më pas çfarë do të ndodhë?! Unë nuk kam ku të shkoj, do të rikthehem në qiell të hapur, e do të fle në kartona. Kërkoj vetëm të më japin një shtëpi ku të fus kokën, edhe nëse është një kasolle, thjesht dua të ndjej njëherë ngrohtësinë dhe sigurinë e një banese. Mua më është mërzitur jeta sepse jam pa punë, e diskriminuar nga të gjithë dhe e vetmuar, askush nuk më ndihmon, madje më përbuzin.”
Anxhela tregon për dritare.net se prej gjashtë muajsh nuk e shet më trupin e vet dhe nuk konsumon më drogën, duke thënë se kërkon të bëjë një jetë normale, por ka nevojë për ndihmë.
“Unë ndjehem shumë e paragjykuar nga të gjitha anët, si shteti por edhe shoqëria shqiptare. Kam trokitur në çdo derë për vend pune, por më kanë refuzuar vetëm se jam tranvestit. Unë jam krenare që jam e tillë dhe nuk do ta mohoj ndonjëherë identitetin tim, pasi që e vogël kisha tendencë të kisha sjellje femërore. Por njerëzit duhet të jenë më të hapur, të më ndihmojnë që edhe unë t’ia dal mbanë në jetë e të mos vdes e vetme dhe e përbuzur.
Kaq ju kërkoj ,o njerëz! Më lini të jetoj dhe mua. Nuk dua as ta shes, as ta lëndoj trupin tim përsëri. Po nuk di a do ia dal, apo sot po flas për herë të fundit për të kërkuar ndihmë…”/ dritare.net/a.m.
