Kompania publike e hekurudhave të Holandës ka thënë se do t’i kompensojë të mbijetuarit dhe familjarët e viktimave që janë transportuar nga trenat e tyre drejt kampeve naziste gjatë Luftës së Dytë Botërore, pas kërcënimeve se do të paditen. Hekurudhat e Holandës ishin paguar në vlerën e 2.5 milionë eurove të sotme për t’i transportuar 102 mijë hebrenj në kampet e përqëndrimit në mbarë Evropën. Në vitin 2005, shefi i hekurudhave kishte kërkuar falje për këtë vepër, por si duket viktimat nuk janë të kënaqura vetëm me këtë.
Vendimi për kompensim erdhi pas bisedimeve të zyrtarëve me një familjar të viktimave, Salo Muller. Prindërit e tij ishin transportuar me një tren holandez për në kampin nazist, ku ishin mbytur me gaz. Ai e shkroi një libër vitin e kaluar, të titulluar “Shihemi sonte dhe më premto se do të bëhesh djalë i mirë”, në kujtim të fjalëve të fundit që ia kishte thënë nëna e saj, para se ta merrnin njësitet “SS” të Gjermanisë naziste.
Kjo nuk është hera e parë që kompanitë e ndryshme paguajnë për veprimet e tyre kundër hebrenjve gjatë Luftës së Dytë Botërore. Në vitin 2014, operatori francez i hekurudhave i kishte paguar 45 milionë euro si kompensim për transportimin e 76 mijë hebrenjve në kampet naziste, ku vetëm 3 mijë prej tyre kishin mbijetuar, shkruan “The Guardian”.
ma.me
