Ministri për Evropën dhe Punët e Jashtme, Ferit Hoxha, deklaroi se manipulimi i informacionit dhe ndërhyrja e huaj përbëjnë një nga sfidat më të mëdha për demokracitë moderne, ndërsa kërkoi bashkëpunim ndërkombëtar mes aleatëve për rritjen e rezistencës ndaj këtyre kërcënimeve.
Duke folur në Konferencën për Përballjen me Manipulimin e Informacionit dhe Ndërhyrjen e Huaj, Hoxha u shpreh se mbrojtja e demokracisë nuk kufizohet më vetëm në territor dhe institucione fizike, por është shtrirë edhe në hapësirën dixhitale, ku informacioni është kthyer në një terren strategjik.
“Ajo që shohim dhe përjetojmë çdo ditë nuk është thjesht diçka e re. Është një transformim sizmik që po zhvillohet para syve tanë”, tha ministri, duke theksuar se informacioni, i cili në demokraci ka qenë gjithmonë një e mirë publike, tashmë është kthyer në një fushë ku testohet besimi, ndikohen zgjedhjet demokratike dhe formohen perceptimet e qytetarëve.
Sipas Hoxhës, Manipulimi dhe Ndërhyrja e Informacionit të Huaj (FIMI) nuk janë thjesht përplasje mes narrativash të ndryshme, por një mjet i mirëorganizuar i presionit hibrid, që synon të dobësojë besimin publik, të shfrytëzojë ndarjet sociale dhe të përdorë teknologjinë e algoritmet për përhapjen e dezinformimit.
“Objektivi i tij nuk është gjithmonë vetëm të na bindë për një narrativë të caktuar. Shpesh objektivi është më i fshehtë: t’i bëjë qytetarët të dyshojnë për gjithçka, të minojë besimin në institucione, në median e pavarur dhe, në fund të fundit, në vetë demokracinë”, deklaroi ai.
Ministri theksoi se asnjë vend nuk është i imunizuar ndaj këtyre rreziqeve, veçanërisht në një kohë kur përdorimi i mediave sociale po rritet dhe zhvillimi i inteligjencës artificiale po ecën me ritme të shpejta.
Duke iu referuar Shqipërisë, Hoxha tha se kjo çështje merr rëndësi të veçantë në një moment kur vendi ndodhet në fazën përfundimtare të negociatave për anëtarësimin në Bashkimin Evropian.
“Sapo hyjmë në fazën e fundit të negociatave tona të anëtarësimit në Bashkimin Evropian, ne jemi gjithnjë e më të ekspozuar ndaj ndikimit dhe manipulimit armiqësor nga ata që nuk ndajnë zgjedhjet tona, vlerat tona ose drejtimin tonë strategjik”, u shpreh ai.
Hoxha nënvizoi se Shqipëria nuk duhet të jetë vetëm përfituese e mbështetjes nga partnerët ndërkombëtarë, por edhe pjesë aktive e përpjekjeve të përbashkëta për mbrojtjen e hapësirës së informacionit.
“Kjo nuk është kohë për hezitim. Është koha për të parë qartë, jo si përfitues pasiv i ndonjë mbrojtjeje të jashtme, por si kontribues në përpjekjet e përbashkëta”, tha ministri.
Ai theksoi se rezistenca ndaj manipulimit të informacionit nuk mund të ndërtohet vetëm nga qeveritë, por kërkon angazhim të përbashkët të institucioneve shtetërore, parlamenteve, medias së pavarur, shoqërisë civile, botës akademike, ekspertëve të teknologjisë dhe vetë qytetarëve.
“Rezistenca nuk mund të kontraktohet nga jashtë. Dhe nuk mund të ndërtohet vetëm nga qeveritë. Kërkon bashkëpunim midis qeverive dhe parlamenteve, medias së pavarur dhe shoqërisë civile, akademisë dhe ekspertëve të teknologjisë”, deklaroi ai.
Ministri Hoxha vlerësoi gjithashtu rëndësinë e bashkëpunimit ndërkombëtar mes aleatëve, duke thënë se përvoja e vendeve që janë përballur drejtpërdrejt me këto kërcënime duhet të kthehet në pjesë të një përgjigjeje të përbashkët.
Ai shtoi se Shqipëria e njeh rëndësinë e lirisë dhe demokracisë, pasi ka kaluar një periudhë ku këto vlera mungonin.
“Ne në Shqipëri e dimë më mirë se kushdo çmimin e lirisë, sepse kemi përjetuar mungesën e saj. Prandaj, nuk do të kursejmë asgjë për të mbrojtur vlerat tona demokratike të fituara me mund”, tha Hoxha.
Në përfundim, ministri theksoi se mbrojtja e hapësirës së informacionit është thelbësore për qytetarët që të mund të formojnë bindjet e tyre, të marrin vendime dhe të ushtrojnë të drejtat demokratike në një mjedis të sigurt dhe të besueshëm. Ai bëri thirrje për më shumë ndërgjegjësim, vizion politik dhe bashkëpunim për ndërtimin e një shoqërie më të qëndrueshme ndaj manipulimit dhe ndërhyrjeve të huaja.
