Edhe pse nuk janë ngritur ende organet e vetingut, ILDKP dhe DSIK po avancojnë sa i takon procesit. Interesant është fakti se kanë nisur kontrollet edhe jashtë vendit, ndërsa do intensifikohen ditët në vijim. Pak ditë më parë, përfaqësuesit e Drejtorisë së Pastrimit të Parave në Kuvend pranuan se janë gati të bashkëpunojnë dhe për shumë emra do dërgohen letërporositë te agjencitë e huaja për verifikim.
Sipas burimeve, ILDKP ka gjetur shumë gjyqtarë dhe prokurorë me llogari bankare jashtë vendit, apo transferta të kryera prej tyre dhe për këtë arsye Drejtoria e Pastrimit të Parave do bëjë një verifikim akoma dhe më të thelluar. Gazeta ka mundur të nxjerrë emrat e parë, të cilët do të kalojnë në sitë.
Interesant është fakti se bëhet fjalë për individë që janë të njohur edhe më parë, pasi janë kallëzuar penalisht nga ILDKP. Sipas burimeve, ILDKP po bën një ballafaqim edhe me deklaratat e mëparshme dhe nëse nuk ka përputhje, atëherë thellohen hetimet. Sipas burimeve, ka shumë gjyqtarë që në deklarimet që kanë bërë në vitin 2015, kanë deklaruar dhe llogari jashtë vendit, mirëpo në 2016 nuk e kanë bërë një gjë të tillë.
Në këtë mënyrë automatikisht nisin verifikimet edhe jashtë vendit nëse janëmbyllur apo jo këto llogari shkruan ‘sot’. Burime të gazetës bënë me dije se në fokus do jenë krerët e institucioneve, por dhe ata persona që janë kallëzuar më parë nga ILDKP.
Sipas burimeve, janë mbi 20 gjyqtarë dhe prokurorë që janë kallëzuar nga ILDKP dhe asnjëri prej tyre nuk është dënuar. Për këtë arsye, ata do kenë një fokus të veçantë, edhe pse disa kanë marrë pafajësi dhe në gjykatë, apo prokuroria ka mbyllur hetimet se nuk ka pasur prova.
Sipas burimeve, një ndër individët që do verifikohet edhe jashtë shtetit është Gjin Gjoni. Nga deklarimet që ai ka bërë tani, por dhe ndër vite, rezulton të ketë llogari bankare jashtë vendit dhe sidomos në Strasburg.
Llogaritë rezultojnë në emër të bashkëshortes së tij dhe për këtë arsye DPPPP do kontaktojë me autoritet franceze për një verifikim më të hollësishëm. Një tjetër emër, i cili është po i njohur, është gjyqtari Osman Aliu. Ai ka dalë i pafajshëm nga Gjykata, si në Shkallën e Parë ashtu dhe në Apel.
Por ILDKP nuk është e kënaqur me këtë vendim dhe për këtë arsye do kërkojë informacione shtesë për të. Një tjetër emër është Ardian Kalia. Edhe ai është kallëzuar më parë për fshehje pasurie dhe transferta të paligjshme. Tjetër emër është Enkelejda Doda, bashkëshortja e gjyqtarit Rasim Doda, apo dhe Adelina Zarka, të cilës iu ndalua viza dhe nga SHBA, por më herët ka qenë e akuzuar për fshehje pasurie.
E njëjtë gjë ka ndodhur dhe me Adelina Zarkën, ku dhe për të do ketë verifikime jashtë vendit, bënë të ditura. Por kjo nuk do të thotë se ata kanë shkelur ligjin, pasi transfertat mund të jenë të ligjshme. Burimet thanë se duke qenë se ligji e detyron institucionin që çdo transfertë apo llogari ta verifikojë, do ndiqen procedurat.
ma.me
