Sikurse ndryshon në bursë vlera e aksioneve në momente të ndryshme, ashtu edhe në tregun e futbollit, periudha aktuale, ajo e merkatos është një moment thelbësor për përcaktimin e vlerës së kartonit të futbollistëve.
Pikërisht në këtë kohë, kur prej vetëm pak ditësh është çelur afati kalimtar dimëror, “transfermarket”, portali më i njohur në përcaktimin e vlerës së kartonëve të futbollistëve dhe publikimin e shumave të transaksioneve në raste transferimi, ka përcaktuar vlerat e përditësuara.
Bazuar në informacionin e gjeneruar nga “transfermarkt”, nuk është aspak e vështirë në hartimin e një klasifikimi të futbollistëve shqiptarë, të renditur sipas vlerës së kartonit të tyre. Një klasifikimi që sundohet në mënyrë të theksuar nga mbrojtësi Elseid Hysaj, i vlerësuar si futbollisti shqiptar më i çmuar në Seria A, madje sipas të gjitha gjasave, edhe përtej, transmeton telesport.
Në ndjekje të mbrojtësit të Napolit, Elseid Hysaj, njëherësh kontingjent i Kombëtares Kuqezi, me vlerë të kartonit në shumën 9 milionë euro, është Etrit Berisha, portieri i Përfaqësueses së Shqipërisë që aktivizohet te skuadra e Lazios, me një vlerë të kartonit në kuotën e 4 milionë euro. Klasifikimi vijon me Vajushin në vend të tretë, Manajn në të katërtin, Strakosha në të pestin dhe Ndoj në vend të gjashtë.
Klasifikimi i futbollistëve shqiptarë në Seria A, sipas vlerës së kartonit.
Elseid Hysaj 9 milionë euro
Etrit Berisha 4 milionë euro
Armando Vajushi 1.7 milionë euro
Rey Manaj 800 mijë euro
Thomas Strakosha 350 mijë euro
Emanuele Ndoj 75 mijë euro
