Çdo transaksion me pronat e paluajtshme, qoftë shitje, dhurim etj. tashmë do të mund të bëhet te noteri pa qenë e nevojshme që të kryhen veprime edhe në Zyrën e Regjistrimit të Pasurive të Paluajtshme. Qeveria me një vendim të fundit ia ka dhënë kështu të drejtë zyrave noteriale që të realizojnë trankasione online me pasuritë e paluajtshme dhe individët nuk jenë më të detyruar që pas këtij veprimi të shkojnë tek Zyrat e Pasurive të Paluajtshme. Burime pranë Dhomës Kombëtare të Noterëve bëjnë të ditur se në total janë 27 shërbime që do të mund të ofrohen nga këto zyra, natyrisht sipas disa tarifave përkatëse, por që nuk janë përcaktuar ende dhe janë në diskutim.
Në këtë mënyrë qytetarët do të mund të kursejnë kohë, duke shmangur radhët e gjata dhe burokracitë në përballjen me Zyrat e Regjistrimit të Pasurive të Paluajtshme.
Më konkretisht, ndryshimet e bëra nga qeveria për procedurat e lëshimit të dokumenteve nga ky insitucion, janë :
– Zyra e Regjistrimit të Pasurive të Paluajtshme ofron shërbimin on-line për kërkesat për aplikim për kryerjen e shërbimeve për noterët. Shërbimet përkatëse të ofruara on-line për noterët miratohen me marrëveshje të përbashkët mes Zyrës së Regjistrimit të Pasurive të Paluajtshme dhe Dhomës Kombëtare të Noterëve.”.
– Pranë Zyrës së Regjistrimit të Pasurive të Paluajtshme do të funksionojë një regjistër i veçantë elektronik i kërkesave për aplikim on-line dhe një regjistër tjetër për përpunim të kërkesave për aplikim dhe i lëshimit të dokumenteve nga Zyra e Regjistrimit të Pasurive të Paluajtshme.
-Procedurat dhe mënyra e trajtimit të kërkesave, sipas pikës 3/1, përcaktohet me një udhëzim të përbashkët të Zyrës së Regjistrimit të Pasurive të Paluajtshme dhe Dhomës Kombëtare të Noterëve.”.
Monitor
