Qeveria shqiptare është duke parë mundësinë për një trajtim financiar shtesë për Task Forcën Speciale në zbatim të operacionit “Forca e Ligjit”. Këtë e konfirmojë vetë Ministri i Brendshëm Fatmir Xhafaj gjatë fjalës së tij në Konventës dy ditore të Bashkëpunimit Policor në Evropën Juglindore.
“Që nga fillimi i këtij operacioni në Nëntor të vitit të kaluar, në zbatim të këtij Plan Veprimi, lufta kundër krimit të organizuar ka marrë një dinamikë dhe dimension tjetër. Rezultatet e arritura, edhe në bashkëpunim me partnerët ndërkombëtarë kanë qenë vërtetë inkurajuese, duke u përballur dhe goditur një sërë grupesh kriminale të rrezikshme, të cilat ushtronin veprimtarinë e tyre në Shqipëri, por edhe jashtë territorit tonë. Qeveria, po shqyrton gjithashtu mundësinë e trajtimit financiar shtesë për këto strukturë që janë në vijën e parë të luftës kundër krimit të organizuar” theksoi ministri i Brendshëm.
Xhafaj tha se policia shqiptare po investon seriozisht në forcimin e kapaciteteve njerëzore dhe logjistike të hetimit, si garanci në rritjen e zbulueshmërisë së veprimtarisë kriminale dhe vënien para përgjegjësisë të autorëve./a.m.
