Në prag të takimit kundër Shqipërisë, trajneri i Serbisë, Radovan Curçiç ka thënë se i pret një ndeshje e vështirë në Elbasan Arena, por lojtarët e tij do të japin maksimumin dhe në mënyrën e duhur do ta përfaqësojnë vendin në ndeshjen për kampionatin Evropian kundër Shqipërisë.
“Para nesh janë dy ndeshje të fundit në këtë cikël, me shumë rëndësi, edhe pse nuk kemi shanse për kualifikim në Kampionatin Evropian. Loja në Shqipëri është më e vështira, jemi të vetëdijshëm për rëndësinë e kësaj ndeshje dhe jam i sigurt se lojtarët do të japin çdo gjë nga vetja dhe do të jenë ambasador të vërtetë të Serbisë”, ka thënë Qurçiq në prag të ndeshjes Shqipëri-Serbi, transmeton Koha.net shkrimin e Tanjug.
Sipas fjalëve të tij shqiptarët kanë motiv të madh sepse fitorja e tyre kundër serbëve do t’ua hapte për herë të parë rrugën për në Francë, kurse ka thënë se ndeshja do të përfundojë pa ndonjë incident dhe fati i takimit do të vendoset brenda 90 minutave të ndeshjes.
