Një zjarr i madh ka përfshirë barin “Le Constellation” në resortin e skive Crans-Montana në Zvicrën jugperëndimore, duke shkaktuar dhjetëra viktima dhe mbi 100 të plagosur. Ngjarja ndodhi në orët e para të Vitit të Ri, ndërsa dhjetëra turistë dhe vendas po festonin.
Një video e publikuar nga brenda barit tregon momentin kur tavani mori flakë, duke u përhapur me shpejtësi në të gjithë ambientin. Dëshmitarët thonë se gjithçka ishte prej druri, çka e bëri zjarrin të përhapet brenda sekondave.
Një i mbijetuar, i cili ndodhej në bodrum, rrëfeu për agjencinë AFP se ishte i bllokuar nga tymi dhe flakët dhe se arriti të shpëtonte vetëm pasi theu një dritare.
“Isha vetëm dhe nuk e dija si mund t’ia dilja, por arrita të thyej një dritare dhe të dal prej saj.
Gjysma e rrobave të mia ishin djegur, ishte çmenduri.
Isha në bodrum. Unë dhe miqtë e mi po argëtoheshim, fatkeqësisht disa nga miqtë tanë nuk janë më mes nesh për shkak të zjarrit.
Ishte çmenduri. Njerëzit ishin të bllokuar. U detyrova të vendos një tavolinë për t’u fshehur pas saj, i rrethuar nga flakët. Por dola. Kjo është gjëja kryesore.”, tha ai, citon BBC.
Duke folur për momentet para se të niste zjarri, ai tha se në bar ndodheshin kamariere “me shishe shampanje dhe flakë shumë pranë tavanit”, dhe se “zjarri u përhap papritur”.
Autoritetet kanë përjashtuar mundësinë e një sulmi, duke e trajtuar ngjarjen si zjarr aksidental. Disa dëshmitarë besojnë se flakët nisën nga qirinj të vendosur mbi shishe shampanje, të cilët prekën tavanin. “Zjarri mori hov papritur,” tha një i mbijetuar.
Ministria e Jashtme italiane: 16 prej të zhdukurve janë shtetasit tanë!
Ministria e Jashtme italiane raportoi se 16 shtetas italianë janë ende të zhdukur, ndërsa 12 deri në 15 të tjerë ndodhen në spital. Tre prej tyre kanë pësuar djegie të rënda dhe pritet të transportohen në Itali për trajtim.
Autoritetet zvicerane konfirmuan se mbi 100 persona janë plagosur, shumica me djegie të rënda, ndërsa spitalet në Valais, Lozanë dhe Zyrih janë në kapacitet të plotë.
Solidaritet dhe ndihmë nga komuniteti
Dubois shtoi se kishte “skena të tmerrshme”, por shumë persona treguan forcë dhe qetësi për të ndihmuar në nxjerrjen e trupave nga flakët.
Autoritetet zvicerane pritet të japin një përditësim zyrtar mbi numrin e viktimave dhe shkakun e zjarrit. Ndërkohë, spitalet po përballen me një fluks të madh pacientësh, ndërsa procesi i identifikimit të viktimave mund të zgjasë javë.
