Autori i vrasjes së vëllait të tij, 41-vjeçari Afrim Sela nga Fushë-Mamurrasi, në fakt ka pasur objektiv të vriste babain e tij.
Ky fakt bëhet e ditur nga burime pranë policisë së Kurbinit, të cilët pohojnë se Afrim Sela prej kohësh ishte në konflikt me babain e tij.
Kjo pasi ky i fundit kishte shitur një pjesë tokë të familjes dhe djalit i kishte dhënë një shumë parash. Ka qenë pakënaqësia për vlerën monetare që e ka shtyrë 41-vjeçarin të nisë konfliktet me të atin i cili jetonte në shtëpinë e vëllait më të vogël, Fabianit.
Mbrëmjen e së premtes 41-vjeçari ka shkuar në banesë për të sqaruar problemin e tij me të atin, teksa me vetë kishte marrë edhe armën e zjarrit.
Sapo ka hyrë në banesë është përballur me vëllanë e vogël më të cilin fillimisht ka debatuar dhe më pas ka qëlluar me armë zjarri në drejtim të tij, ndonëse në banese ndodhej edhe familja e të vëllait edhe prindërit.
Ditën që kreu vrasjen autori kishte edhe ditëlindjen, ndërsa familjen e tij pak ditë para ditës kur ndodhi krimi e kishte larguar nga shtëpia. Afrim Sela është arrestuar nga policia dhe pritet të dalë përpara trupit gjykues.
