Një ngjarje tragjike, e denjë për botën migjeniane, ka ndodhur në këmbët e Urës së Dajlanit në Durrës. News 24 raporton se një foshnje vetëm njëmuajshe nuk ka mundur ti rezistojë të ftohtit. Ngjarja e rëndë ka ndodhur në Durrës, ku një nënë e pastrehë është detyruar të kalojë natën poshtë urës bashkë me foshnjën e saj të porsalindur, të seksit femër.
18vjeçarja që i përket komunitetit rom, tregon se e ka gjetur të pajetë foshnjën e saj mëngjesin e sotëm. Ajo shprehet se është e divorcuar dhe e pastrehë, ndërsa flinte bashkë me foshnjen poshtë urës prej 2 javësh, që kur ishte dëbuar nga shtëpia në Berat.
Ditën lypte sa për të siguruar një copë bukë dhe natën ndizte një zjarr poshtë urës për të ngrohur foshnjen. Kjo ishte jeta e Vojsavës prej dy javësh. Në një prononcim për News 24 pas tragjedisë ajo tregoi: “Jam e divorcuar dhe e pastrehë. Burri më ka dëbuar nga shtëpia pasi linda vajzën. Kam 2 javë që fle nën urë, lyp për të ushqyer vajzën. Por sot vajza kishte ngrirë nga i ftohti”.
Policia e Durrësit ka nisur ndërkaq hetimet për këtë ngjarje të rëndë.
BW
