Motorët e avionit Boeing 787 të kompanisë Air India, që u rrëzua më 12 qershor në periferi të Ahmedabad-it, u fikën nga dikush brenda kabinës së pilotimit menjëherë pas ngritjes. Hetimet paraprake përjashtojnë problemet teknike dhe po përqendrohen në një veprim të qëllimshëm nga njëri prej pilotëve ose një person i tretë i pranishëm në kabinë.
Lajmi është konfirmuar nga analiza e “Flight Data Recorder”, që tregon se ndërprerësit e karburantit drejt motorëve janë zhvendosur nga pozicioni “Run” në “Cutoff”, duke ndaluar furnizimin me karburant dhe shkaktuar fikjen e të dy motorëve vetëm pak sekonda pas ngritjes.
Avioni, që udhëtonte nga Ahmedabad drejt Londrës me 242 persona në bord, u përplas 30 sekonda pas ngritjes duke shkaktuar 270 viktima, 241 nga pasagjerët dhe ekuipazhi, dhe 29 të tjerë që ndodheshin në një mensë universitare. Vetëm një person arriti të mbijetojë.
Sipas ekspertëve, për të fikur motorët, ndërprerësit duhet të ngrihen me dorë, çka përjashton një gabim të thjeshtë teknik ose prekjen aksidentale.
Autoritetet indiane kanë nisur kontrolle të plota mbi të gjithë flotën e Boeing 787 në pronësi të Air India, por deri tani nuk janë konstatuar defekte të ngjashme në pjesët strukturore apo sistemet elektronike të avionëve.
Ndërkohë, regjistrimet audio të kabinës, janë ende objekt negociatash mes Indisë dhe Shteteve të Bashkuara. Raporti paraprak pritet të publikohet së shpejti, por burime perëndimore shprehen skeptike nëse raporti përfundimtar do të bëhet ndonjëherë publik.
