Një aksident i rëndë ka ndodhur në aksin rrugor Torovicë-Malecaj në qarkun e Lezhës. Një masiv shkëmbor është shkëputur duke rënë mbi një automjet që ishte në ecje e sipër duke shkaktuar 3 viktima, pjesëtarë të një familjeje.
Sipas policisë, viktimat, dy vëllezër dhe bashkëshortja e njërit prej tyre udhëtonin me mjetin tip “Land Rover” me targa AA 322 CV.
Në aksident mbetën të vdekur vëllezërit Edmond dhe Valentin Zefi. Viktima e tretë është bashkëshortja e njërit prej tyre, shtetasja Alda Gjergji Zefi.
Reshjet e shiut të rëna gjatë paradites së kësaj të shtune kanë nxitur rënien e gurëve në këtë pjesë të rrezikshme të Torovicës së Lezhës. Ky mendohet të ketë qenë shkak i aksidentit fatal.
Gruaja ishte shtatzënë, po shkonte te prindërit
Sipas raportimeve, tre viktimat po udhëtonin nga fshati i tyre Balldre në drejtim të familjes së prindërve të bashkëshortes së njërit prej vëllezërve, një fshat jo shumë larg nga vendi ku ndodhi tragjedia. Dy vëllezërit dhe gruaja shtatzënë po shkonin atje për një vizitë familjare.
Informacioni paraprak nga Policia:
Me datë 07.10.2017, në rrugën Torovicë – Malecaj në Lezhë , një masiv shkëmbor është shkëputur nga mali duke rënë mbi një mjet tip fuoristradë Land Rover me targë AA 322 CV.
Deri në këto momente, janë identifikuar 3 viktima të cilët ndodheshin brenda në mjet pasi gjysma e mjetit është e shtypur dhe mbuluar nga masivi shkëmbor.
Shërbimet policore në bashkëpunim me Prokurorinë e Rrethit Gjyqësor Lezhë, zjarrfikëset dhe ambulancën ndodhen në vendngjarje për veprime të mëtejshme.
/a.m.
