Një tragjedi ka ndodhur në fshatin Jabllanicë të Gjakovës pasi tre fëmijë kanë humbur jetën. Ata janë zënë poshtë pasi u shemb një banesë e pabanuar. Nuk dihen arsyet se pse ata gjendeshin aty në atë moment.
Siç raportojnë mediat në Kosovë, dy nga viktimat i përkasin moshës 15-vjeçare ndërsa i treti, i moshës 14-vjeçare. Lajmin e konfirmoi për Klan Kosovën, zëdhënësi i policisë për rajonin e Gjakovës, Sheremet Elezaj i cili tha se në vendin e ngjarjes shkuan menjëherë policia, ambulanca dhe zjarrfikësit.
“Më datë 1 Shkurt 2025, rreth orës 22:50, jemi njoftuar se në fshatin Jabllanicë është rrëzuar pllaka e një shtëpie të pabanuar, duke zënë poshtë tre fëmijë. Në vendngjarje kanë dalë njësitë e nevojshme policore, si dhe ekipet e emergjencës, përfshirë ambulancën dhe zjarrfikësit. Personeli mjekësor ka konstatuar në vendngjarje vdekjen e viktimave”, tha Elezaj.
Ai theksoi se për rastin është njoftuar edhe prokurori dhe së bashku me të po kryhen hetimet për të zbardhur këtë ngjarje të rëndë.
Në lidhje me tragjedinë në Gjakovë, ka reaguar edhe kreu i komunës atje, Ardian Gjini, i cili u shpreh i tronditur. Në një postim në rrjetet sociale ai u ka shprehur ngushëllime familjeve të viktimave.
“Jam i tronditur nga lajmi për humbjen e jetës së tre fëmijëve në Jabllanicë sonte! Ngushëllimet e mia më të sinqerta për familjet! Nuk ka fjalë që e shprehin dhimbjen! Le të bëjmë krejt çka mundemi të jemi me familjet në këto çaste të rënda! Qofshin të parajsës engjëjt!”, ka shkruar Gjini.
