Një 17-vjeçare është gjetur e vdekur në tualetin e shkollës “Murialdo” në Fier. Vajza u gjet e pajetë nga nxënëset e tjera të shkollës ndërkohë ende nuk dihen shkaqet e vdekjes së saj.
Adoleshentja e ndjerë është shtetasja Ana Rina, nga fshati Sheqishtë.
Në vendngjarje kanë mbërritur efektivët e policisë ndërkohë trupi i pajetë u transportua në morgun e Fierit, ku pritet të kryhet autopsia. Nga kqyrja paraprake e trupit, nuk janë konstatuar shenja dhune. Dyshohet se ajo është helmuar ose ka humbur jetën për shkak të ndonjë problemi shëndetësor.
Njoftimi i policisë:
Më datë 06.03.2017, ora 14:40, njoftohemi se në Spitalin Rajonal Fier ka shkuar e vdekur nxënësja A.R, 17 vjeç, nxënëse e shkollës profesionale “Murialdo”. Nga hetimi paraprak i ngjarjes rezulton se nxënësja A.R ka shkuar në tualetin e shkollës dhe nuk ka dalë prej andej për një kohë të gjatë.
Më pas kanë shkuar për kontroll personeli i shkollës dhe disa nga shokët e klasës dhe rreth orës 14:25 e kanë gjetur nxënësen të shtrirë në dyshemenë e tualetit, kanë lajmëruar ambulancën dhe e kanë nisur për në spital. Nga këqyrja nuk janë konstatuar shenja dhune në trup. Paraprakisht dyshohet për helmim ose problem shëndetësor. Po bëhet këqyrja nga mjeku ligjor për të dalë në konkluzionin e shkakut të vdekjes. Hetimet vazhdojnë për sqarimin e rrethanave.
/a.m.
