Katërmbëdhjetë ushtarë kazakë kanë humbur jetën në Detin Kaspik, pas një incidenti gjatë një stërvitjeje detare të Forcave Detare ndërsa tre të tjerë janë shpëtuar.
Incidenti ndodhi më 24 shtator, në rajonin Mangystau të Kazakistanit. Ushtarakët që humbën jetën kishin lindur midis viteve 2005 dhe 2007.
Sipas Ministrisë së Mbrojtjes së Kazakistanit, ushtarët po zbarkonin nga anija ushtarake “Kaisar” në ujë rreth një metër të thellë, kur u përfshinë në det të hapur nga erërat e forta dhe një përkeqësim i papritur i kushteve të motit.
Presidenti i Kazakistanit, Kassym-Jomart Tokayev, e shpalli 25 shtatorin ditë zie dhe u shprehu ngushëllime familjeve të viktimave. Ai urdhëroi gjithashtu autoritetet që të përcaktojnë rrethanat e incidentit.
Tragjedia ka rikthyer vëmendjen te një tjetër incident fatal gjatë ushtrimeve ushtarake në Detin Kaspik. Në vitin 2015, katër ushtarakë humbën jetën gjatë ushtrimeve pranë Aktaut, pasi erërat dhe valët e forta përmbytën katër transportues të blinduar të personelit.
Një komision qeveritar, i kryesuar nga zëvendëskryeministri Kanat Bozumbayev, ka qenë duke punuar në vendngjarje.
Zyra e Prokurorit të Përgjithshëm tha se hetuesit kanë inspektuar vendin e ngjarjes, kanë marrë në pyetje më shumë se 30 personel ushtarak dhe kanë sekuestruar dokumente dhe pamje video.
Sipas gjetjeve paraprake, zyrtarët e dyshuar nuk kanë marrë masat e nevojshme për të garantuar sigurinë e personelit, ndërsa kushtet e motit po përkeqësoheshin.
