Britania është tronditur nga një tragjedi e dyfishtë në familje. Vajza 32-vjeçare nuk arriti të përballonte emocionet e forta teksa nëna e saj, Julie Murphy, viktimë e koronavirusit po varrosej.
Si pasojë, Laura Richards nga Warwickshire pësoi atak kardiak dhe ndërroi jetë.
Të pranishmit nxituan ti japin ndihmën e parë, por ishte e pamundur që ta kthenin në jetë. Ngjarja tragjike ndodhi të martën e kaluar.
Motra e Lauras, Sadie u shpreh se familja është shkatërruar nga tragjedia. E kontaktuar nga “Sun Online”, ajo tha se nuk u lejua të merrte pjesë në funeral për shkak të distancimit social.
45-vjeçarja rrëfeu si ndodhi tragjedia e dyfishtë duke thënë: “Ata po varrosnin nënën dhe Laura papritur tha ‘Nuk marr dot frymë, nuk marr dot frymë’, dhe filloi të prekte gjoksin. Vajza ime i tha të ulet dhe i vendosi një pallto sipër, por mezi fliste sepse e kishte të vështirë të merrte frymë. U përpoqën ti jepnin ndihmë, por asgjë nuk mund të bëhej pasi pati një sulm në zemër. Humbja e motrës në funeralin e nënës është si një film horror. Ishte vetëm 32 vjeçe”.
Ndërsa nëna e tyre ndërroi jetë më 15 mars në spital pasi nuk i mbijetoi luftës me koronavirusin.
