Një ditë pas operacionit “Telefonata e fundit” në kryeqytet ku u sekuestruan rreth 700 gram kokainë dhe u arrestuan 3 persona, BalkanWeb mëson detaje të reja nga aktiviteti kriminal. Sipas të dhenave rezulton se kokaina kishte ardhur nga Holanda. Po kështu burime nga policia pohojnë se grupi që dyshohet se përbëhej nga 6 vetë e shpërndanin kokainën në zonën e “5 Majit”, në Laprakë dhe në lokalet e Bllokut. Ditën e djeshme grupi ka pasur 1 kg kokainë por rreth 300 gram dyshohet se janë shitur. Të arrestuarit, sipas burimeve janë shpërndarës të dorës së dytë.
ÇMIMI
Rreth 100 mijë euro për 1 kg kokainë siguronin trafikantët dhe shpërndarësit e drogës. Burime nga grupi hetimor pohojnë se grupi shpërndante 20 doza në ditë. 0.8 gram shitej për 100 euro. Pra rreth 2000 euro në ditë.
Operacioni u zhvilluar dje në rrugën “5 Maji” në kryeqytet, ku arrestuan tre persona dhe sekuestruan 659 gramë lëndë narkotike, të llojit kokainë.
Burime nga vendi i ngjarjes bënë të ditur për ‘BalkanWeb’ se gjatë operacionit janë dëgjuar edhe të shtëna me armë, pasi policia është detyruar të qëllojë në ajër për neutralizimin e të rinjve. Policia sqaroi se në momentin e ndalimit njëri nga të rinjtë ka nxjerrë një armë zjarri dhe për pasojë shërbimet policore janë detyruar të bëjnë qitje në ajër për neutralizimin e më pas prangosjen e këtij shtetasi dhe të dy të tjerëve
Në pranga kanë rënë: Sokol Geci 22 vjeç nga Tropoja banues në Tiranë, Eraldo Dodaj 19 vjeç nga Mirdita dhe Pashk Teska 20 vjeç nga Laçi. Ndërkohë mësohet se policia ka sekuestruar makinën me të cilin udhëtonin tre të rinjtë, ku është gjetur lënda narkotike dhe një armë tip pistoletë “TT”.
ma.me
