Polici i Kosovës, përkatësisht i Njësitit për reagim të shpejtë, Dejan Vllashkoviç, i cili ka qenë në rroba civile dhe jashtë detyrës, është rrahur brutalisht nga disa persona të hënën rreth orës 22:40 para kafiterisë ‘Incognito’ që ndodhet në rrugën ‘Kral Petar’ në veri të Mitrovicës.
Burime të KP bëjnë të ditur se polici ka qenë në gjendje të dehur dhe pasi me automjetin e tij ka goditur pa qëllim një xhip ‘Land Rover’ që ka qenë i parkuar, disa persona kanë dalë menjëherë nga kafiteria ‘Incognito’ dhe e kanë rrahur brutalisht deri në alivanosje.
“Është rrahur keq me këmbë e grushte e me çka jo tjetër deri në alivanosje dhe pastaj është dërguar në spital. Ivan Mllagjeviç, i njohur si trafikant, është personi që më së shumti e ka rrahur dhe i ka shkaktuar lëndime policit”, kanë thënë burimet. Mësohet se polici vazhdon të trajtohet në spitalin e veriut të Mitrovicës, ndërsa është jashtë rrezikut për jetë.
