Një operacion i policisë italiane i koduar “Besa”, ka vënë në pranga 25 persona si pjesë e një organizate kriminale që merrej me shpërndarje droge.
Operacioni u kurorëzua gjatë së mërkurës dhe në orët e para të mëngjesit të sotëm nga policia e Trento, ku u vunë në pranga të dyshuarit të cilët vepronin në zonat e Alto Adige, Veneto, Puglia, Shqipëri dhe Zvicër.
Hetimet lidhur me grupin kriminal nisën në vitin 2018 dhe vijuan deri mëngjesin e kësaj të enjteje, ku u sekuestrua lëndë narkotike me vlerë rreth 500 mijë euro dhe më konkretisht kokainë, hashash dhe marijuanë, në total 25 kilogramë.
Gjithçka pasi një vit më parë nisi monitorimi i disa shqiptarëve me precedentë penalë në fushën e narkotikëve çka çoi në zbulimin e një rrjeti më të madh trafiku.
Ndaj grupit kriminal Gjykata e Trentos lëshoi 25 urdhra arresti, duke arrestuar në Itali 22 persona dhe tre në Shqipëri, Hungari dhe Turqi.
Pikërisht për shkak të numrit të madh të shqiptarëve të përfshirë në këtë organizatë, operacioni mori emrin në gjuhën shqipe “Besa”.
/a.r
