Një mega-operacion anti-drogë është duke u kryer nga karabinierët e Venecias në Itali, por që është shtrirë edhe në Spanjë e Austri, teksa deri më tani janë kryer 20 arrestime të anëtarëve të një organizate të formuara nga italianët, moldavët, ukrainasit dhe shqiptarët.
Me prova të forta në duar, prokurorët dhe karabinerët po veprojnë së bashku për të konfiskuar edhe pasuritë e paluajtshme të bandës së drogës, që kapin një vlerë totale prej rreth 1 milion euro.
Sipas mediave italiane, nga hetimet e kryera nga prilli i 2017 deri në prill të 2018, janë zbuluar prova konkrete për veprimtarinë kriminale të këtij grupi të mirë-strukturuar.
Policia ka zbardhur importet nga Spanja të sasive të mëdha të marihuanës dhe hashashit, prej një sasie të vlerësuar në rreth 200 kilogram. Lënda narkotike më pas shitej në brendësi të Venecias, si dhe në krahinat e Padovës, Vicencës dhe Trevisos, gjithashtu pranë shkollave, veçanërisht në mesin e të miturve.
Droga mbërrinte në Padova nga Almeria me korrierë të cilët përdoreshin për ta futur lëndën narkotike në bagazhet e autobusëve ose nga korrierët që e sillnin nga Gjermania në bordin e makina luksoze.
Gjashtë prej të arrestuarve janë nga Padova dhe sipas zyrës së prokurorit publik venecian, ata do të përfshiheshin në trafikimin e madh të drogave që vinin nga Spanja në Veneto.
a.ç
