Paparaci i njohur italian, Fabricio Korona, ka lëshuar një tjetër “bombë” për mediat rozë. Këtë herë, në epiqendër të vëmendjes është trajneri Roberto Mançini, i cili sipas tij, ka një lidhje sekrete prej 5 vitesh me Hoara Borselin.
Ish-modelja, e cila është aktualisht një gazetare, e interviston vazhdimisht Mançinin dhe ai i ka dhënë asaj 4 ekskluzive në dy vitet e fundit. Korona ka shpjeguar se si është historia mes të dyve.
“Roberto Mançini është prej 5 vitesh i lidhur me gazetaren që është ikonë e të djathtës, Hoara Borseli. Si ia bën që i lejon vetes rroba markash të njohura me një kontratë normale gazetareje? Ndoshta tani e kemi kuptuar përse ai shkoi në Arabi për të fituar 30-40 milionë euro në vit”, shkruante Korona, duke bërë publike historinë mes gazetares dhe Mançinit.
Ironia e fatit është se Mançini e ka njohur të dashurën e tij sekrete nëpërmjet një ish-miku të tij, me të cilin ka luajtur në radhët e përfaqësueses italiane, Valter Zengës. Ky i fundit kishte një lidhje disavjeçare me modelen, por pastaj rrugët e tyre vendosën të ndaheshin kur Zenga u transferua në SHBA për të jetuar disa vite atje, siç ka zbuluar vetë ish-portieri, para se Hoara t’i hynte profesionit të gazetarisë.
Pas publikimit të lajmeve, tashmë ish-trajnerit të Italisë do t’i duhet të japë disa shpjegime para familjes së tij, pasi ai është i martuar dhe bashkëshortja e tij e ka mësuar këtë histori nga mediat.
