Një foshnje 2-muajshe ka ndërruar jetë në Qendrën Spitalore Universitare “Nënë Tereza” në Tiranë, pas transportit urgjent nga Spitali Rajonal i Korçës për mjekim më të specializuar, për shkak të gjendjes së rëndë shëndetësore.
Mësohet se foshnja ndërroi jetë disa orë pas mbërritjes në kryeqytet, ku pavarësisht ndërhyrjes së menjëhershme të mjekëve, nuk ka mundur të mbijetojë. Sipas mjekëve të pediatrisë, foshnja ka ardhur në spital me probleme të theksuara respiratore dhe parametrat jetësorë ishin në kufijtë minimalë, duke treguar një gjendje shumë kritike, raporton gazetarja e Klan News Daniela Zisi.
Nga ana e grupit hetimor konfirmohet se materialet për rastin janë dërguar në Prokurorinë e Korçës, ku gjatë hetimeve do të zbulohet nëse shkak i vdekjes ka qenë kequshqyerja apo ndonjë problem tjetër shëndetësor, që foshnja mund të ketë pasur që nga lindja.
Nga ekzaminimet rezultoi se foshnja nuk kishte fituar peshë që nga lindja, duke mbetur vetëm 1 kilogram, e njëjtë me peshën në momentin e lindjes dy muaj më parë.
Foshnja kishte lindur parakohe rreth dy muaj më parë, kur nëna ishte në muajin e shtatë të shtatzënisë, dhe sipas mjekëve kjo gjithashtu ka rënduar gjendjen shëndetësore të saj, që në momentin e lindjes.
Grupi hetimor thekson se hetimet për rastin do të vijojnë, duke analizuar në detaje të gjithë dokumentacionin mjekësor dhe faktorët që mund të kenë ndikuar në vdekjen e foshnjës, për të përcaktuar shkakun konkret dhe për të marrë masat ligjore përkatëse.
