Avokati i Popullit, Z. Igli Totozani, ishte sot në disa nga urat e shkatërruara në Bashkinë e Elbasanit dhe Bashkinë e Peqinit. Së bashku me një grup ekspertësh nga institucioni , z. Totozani u ndal në Urën e Broshkës , urën e Grykshit, të Çengelaj, urën e vjetër të Peqinit dhe atë të By Pass-it të Peqinit, duke monitoruar nga afër situatën e krijuar për banorët e izoluar në këto zona.
Avokati i Popullit e konsideroi të papranueshëm izolimin total të mijëra familjeve nga shkatërrimi i urave që janë ndërtuar vetëm prej pak vitesh. Z. Totozani tha se institucionet shtetërore përkatëse duhet të mbajnë përgjegjësi, që objektet e infrastrukturës të monitorohen për gjendjen e tyre teknike,por edhe të mirëmbahen gjatë gjithë kohës, dhe jo të kujtohen për to vetëm atëherë kur ndodhin shkatërrime.
Avokati I Popullit shprehu shqetësimin edhe për mungesën e ndërhyrjeve të shpejta për zgjidhjen e kësaj situate, për shkak të problemeve ligjore, ku institucionet i shmangen përgjegjësive, duke ja pasuar detyrimin për ndërhyrje njëra- tjetrës. “Kjo situatë ngërçi ligjor duhet të marrë fund menjeherë- tha Avokati i Popullit, duke theksuar se janë banorët e zonave, ata që vuajnë pasojat e këtij izolimi absurd”. Z. Totozani kërkoi nisjen e menjëhershme të vlerësimit të dëmeve pa të cilin nuk mund të fillojë ndërhyrja për rekuperimin e gjendjes.
“Sa herë që prishen ura apo rrugë mban era korrupsion”, tha Avokati I Popullit. Ai ftoi Prokurorinë të hetoj çdo rast të tillë, ku merren në dorëzim objekte jashtë standarteve dhe kushteve teknike . Z. Totozani kërkoi nga Organi i Akuzës që të hetojë ata individë të përfshirë.
Z. Totozani bisedoi edhe me drejtues të Emergjencave civile, ku kërkoi informacion mbi masat që po merren për t’i ardhur në ndihmë banorëve të këtyre zonave, ndërsa u shpreh se është e pakonceptueshme që ura të ndërtuara qindra vjet më parë I rezistojnë kohës dhe vërshimit të lumenjve, por urat e ndërtuara në vitet e fundit shkatërrohen nga vërshimi i parë i ujit.
Avokati I Popullit në përmbushje të detyrimeve kushtetuese do të përgatisë rekomandime të posaçme drejtuar institucioneve përgjegjëse, që situata të tilla të mos përsëriten, si dhe fajtorët të japin llogari për dëmet e shkaktuara.
