Pranë institucionit të Avokatit të Popullit është ngritur tashmë një seksion i mirëfilltë për të monitoruar mbrojtjen e të drejtave të fëmijëve jetimë. Avokati i Popullit, Igli Totozani, i ftuar në emisionin “Njerëz në Fokus” në News 24, tha se puna e këtij komisioni konsiston edhe në monitorimin e kushteve në të cilat jetojnë fëmijët, si ushqehen, shkollohen e trajtohen.
“Avokati i Popullit ka monitoruar në mënyrë të vazhdueshme qendrat rezidenciale të fëmijëve. Falë ndihmës ndërkombëtare më së fundi është bërë e mundur që të ndërtohet një seksion i mirëfilltë pranë AP që të merret me mbrojtjen e të drejtave të fëmijëve. Do të jenë 3-4 persona që do të kujdesen për këtë pjesë, pasi një person është pamundur që të arrijë të monitorojë të gjithë problematikën. Janë 9 qendra rezidenciale, parashkollore dhe shkollore, Tiranë, Sarandë dhe Shkodër. Ka edhe qendra 3-6 vjeç. Do të ishte nder, e vërtet ta meritoja që të isha avokat i fëmijëve, pasi e meritojnë. Ka kaq shumë problematika për ta”, tha Totozani.
Institucioni i Avokatit të Popullit ka përgatitur një raport pas monitorimit të kushteve në këto qendra rezidenciale, të cilin do ta dorëzojë në Kuvend.
Totozani tha se deri më tani ka një rast dhune ndaj fëmijëve që AP e ka dorëzuar në Prokurori./a.m.
