Kandidati i “Aleancës për Shqipërinë Europiane” për Bashkinë e Cërrikut, Altin Toska së bashku me Ministrin e Transportit Edmond Haxhinasto, zhvilluan një takim me banorë të lagjes nr. 2 në Cërrik. Gjatë fjalës së mbajtur në këtë takim, Toska tha se ka si prioritet një plan urbanistik zonal me përparësi që ta kthejë lagjen në një vend me parametra të larta urbane për të zhdukur problemet me infrastrukturën rrugore dhe ujërave të zeza në lagje.
Kandidati i së majtës u shpreh se çdo ditë duhet të kontribuojmë që hapësira jonë e përbashkët të jetë më e mirë për fëmijët dhe për familjet tona.
“Bashkinë e Cërriku do ta qeverisim bashkë me ju, për t’iu përmbajtur programi që ne kemi hartuar. Ato çka janë shkruar në këtë program janë premtimet që ne zotohemi se do t’i realizojmë në katër vitet e ardhshme me mbështetjen e qeverisë shqiptare, me forcën e votës suaj dhe me vullnetin dhe vizionin tonë. Për këtë duhet të ndiheni krenarë dhe besimplotë, sepse fitorja nuk është e njëri apo e tjetrit, por është e të gjithëve bashkë”, tha Toska.
Ndërsa Ministri i Transportit tha se programi i kandidatit Toska është një pasqyrë e përkushtimit që ai ka për Cërrikun dhe se pas fitores më 21 qershor do të nisë një ndryshim rrënjësor i këtij qyteti.
“Është një program i cili është një refleksion, një pasqyrë e qartë e përkushtimit të Altin Toskës për cërrikun, e njohjes së thellë që Altin Toska ka për problemet e Cërrikut në përgjithësi, por është gjithashtu edhe një refleksion i vizionit të tij se si mund të realizohet dhe këtu një qytet krejtësisht tjetër, një bashki krejtësisht tjetër, ku njerëzit të kenë qejf të jetojnë dhe të punojnë sigurisht. Në programin tonë i jepet zgjidhje problemit të punësimit që është një problem jo vetëm për Cërrikun por edhe për të gjithë Shqipërinë”, – tha Haxhinasto, duke premtuar një ringjallje urbanistike për qytetin me objekte të shumta sociale dhe kulturore.
