Në një intervistë të gjatë për gazetën zyrtare të FRD-së, “Fryma e re”, Bamir Topi tregon mbi atmosferën politike sot, ku ndodhet aktualisht situata politik dhe ekonomike në Shqipëri. Janë disa çështje konkrete ku sipas gazetës në fjalë, është ngecur pushteti politik përballë qytetarëve por dhe përballë partive të tjera.
Ish-presidenti Topi paraqet propozimet politike të FRD-së. Kodi zgjedhor, reformat në drejtësi së bashku, dhe mbi të gjitha ndryshimet në Kushtetutë janë propozimet bazike të politikës së FRD-së.
“PD dhe PS e kanë kthyer në domenin e tyre ligjin elektoral. Kam bindjen që nëse nuk ka reflektim nga këto dy parti, do të ketë një reagim në bllok të të gjithë partive të tjera, që nuk e shohin veten si satelitë të partive që kanë luajtur me demokracinë e zgjedhjeve në Shqipëri. Propozimi politik i FRD-së është ende i qartë. Reforma e ligjit elektoral duhet të jetë proces paralel me reformën në drejtësi dhe të dyja kërkojnë prekjen e Kushtetutës në një kohë” – thotë Topi.
