Jozefina Topalli ka dalë sot në një konferencë për shtyp ku ka sulmuar kreun e Partisë Demokratike.
Në fjalën e saj, ish-kryetarja e Kuvendit ka kërkuar një garë të drejtë dhe transparente sipas statutit.
“Në zgjedhjet e fundit situata po përshkallëzohet edhe më rëndë. Lulzim Basha po i mponon PD-së një garë të rreme. Duke e bërë procesin jo serioz dhe të papërgjegjshëm, z. Basha po kërkon jo thjeshtë të marrë peng partinë dhë të grabisë mandatin, por po tenton t’i shmanget llogaridhënies për humbjen katastrofale. Basha shpreson që përmes garës së tij të rremë të shndërrohet nga humbës në fitimtar. Demokratët nuk ia falin kurrë edhe sikur të manipulojë 100% rezultatin e garës” – tha Topalli.
Ajo tha se nga një opozitë e rreme nuk mund të kalohet në një garë të rreme.
“Z.Basha është katastrofa e Partisë Demokratike, falë opozitës së përciptë dhe taktikave elektorale të ngritura mbi personalitetin e tij të rremë. Ai i dha ndihmën më të madhe mikut të orëve të vona, Edi Ramës. Demokratët e dinë shumë mirë ndaj Basha po kërkon të shkeli procesin dhe forumet e partisë. Ai nuk pranon barazi në garë dhe rregulla të drejta. Z. Basha tmerrohet nga forumet” – tha ish-deputetja e Shkodrës.
Topalli i bëri thirrje Bashës të ndalë pengmarrjen e partisë, përpara se të përballet me zemërimin e demokratëve.
