Statusi i Jozefina Topallit, i publikuar këtë të shtunë në Facebook, duket se ka nxitur kreun e PD në Shkodër që të reagojë kundër deputetes së tij.
Ramiz Çobaj i është përgjigjur Topallit po ashtu në Facebook, duke thënë se:
“Fitorja në Shkodër nuk erdhi as nga “Ambasadoret shëtitës” të Razmës, apo Gjirit të Lalëzit, por nga puna e jashtëzakonshme e strukturave të Partisë Demokratike Dega Shkodër. Shkodra të voton kur punon drejt, kur punon me përkushtim, kur je i vërtetë, ashtu siç edhe të ndëshkon kur gabon, kur nuk respekton dhe kur je larg realitetit…….” – shkruan Çobaj.
Edhe pse Çobaj ka qenë një nga deputetët e propozuar nga Topalli, me ardhjen e Bashës duket se kanë ndryshuar balancat, raporton Tema.
Dy ditë më parë, Jozefina Topalli sulmoi Bashën si përgjegjësin kryesor për disfatën e së djathtës në këto zgjedhje.
Ajo shprehej se humbja e PD në zgjedhjet lokale të 21 qershorit ishte po aq e thellë sa ajo në vitin 1991 kur fitoi Partia e Punës.
