Deputeti i Partisë Socialiste Toni Gogu ka folur sot në “Milori Live” në Klan News për fushatën e mazhorancës para zgjedhjeve të 14 Majit.
Gogu thotë se PS po bën diçka të mirë dhe ndryshe për qytetet, e nga ana tjetër ka përballë sipas tij një ‘opozitë në hall’.
“Nga njëra anë duam të bëjmë një gjë të mirë për qytetin, por nga ana tjetër të tregojmë diçka ndryshe. Më shumë se ne flet puna, puna e 8 viteve në Tiranë e një sërë punësh. Nga ana tjetër ekonomia jonë ndeshet më një sërë sfidash, kemi bërë një mbulesë energjitike, një mbrojtje të mirë sociale, gjithë këto ndërhyrje tonat duhen parë si kanë ndikuar në familjen e thjeshtë shqiptare. Nuk duhet ta mohojmë edhe kundërshtarët janë në një hall të madh, nuk dinë ç’thonë. Janë njerëz në hall, dhe një njeri që nuk zgjidh hallet e veta, si mund të zgjidhë ato të elektoratit. Ne përpiqemi të bëjmë një punë, të adresojmë një problem, nga krahu andej perfeksionohet sharja, fyerja dhe sondazhet e tregojnë gjithnjë e më shumë epërsinë e socialistëve.”
Deputeti socialist theksoi se e rëndësishme është marrja e votës së vërtetë të qytetarëve, duke shtuar se ekonomia shqiptare ka bilance pozitive.
“Duam votën e vërtetë, autentike të qytetarëve shqiptarë, që na tregon pulsin e shoqërisë tonë. Integrimin europian e kemi ëndërruar dhe është një punë që është vonuar gjatë. Nga ana tjetër duam të kuptojmë se prenotimet janë trefishuar, ekonomia jonë po konkurron me atë globale, kjo është një sfidë se sa fiton Shqipëria. Ne besojmë se politika është mjeti i shpresës për të përmirësuar jetesën, nuk kanë rëndësi politikanët e vjetër. Zoti Rama me qeverinë po i përgjigjen sfidave të ekonomisë globale, faktorët nuk vijnë nga ekonomia shqiptare sepse yni është bilanc pozitiv, parametrat janë në rregull, por kemi goditje të jashtme.“
/a.r
