Deputeti i përjashtuar nga Partia Socialiste Tom Doshi lë të hapur mundësinë për të krijuar një parti politike së bashku me ish-Kryeministrin Fatos Nano.
Gazeta Shqiptare ka publikuar batuat që deputeti Doshi ka bërë ditën e djeshme me gazetarët në dalje nga seanca gjyqësore ku fitoi lirinë.
I pyetur se përse nuk e zgjon Fatos Nanon nga gjumi dhe të krijojë një parti me të, Blushin dhe Gjinushin, Doshi është përgjigjur:
“Po të më ftojë Nano, e bëj menjëherë një parti, se mua më voton gjithë Shkodra edhe sikur të kandidoj për partinë e dreqit.” është shprehur ai
Megjithatë ish-deputeti i PS ka shigjetuar edhe kandidaten e mazhorancës për Bashkinë e Shkodrës, Keti Bazhdari, për të cilën është shprehur se “ajo premton pistë për ski në Postribë, ndërkohë që atje njerëzit hanë bukë dhe qepë, ndërsa shumë komuna të tjera s’kanë ujë me pi”.
Doshi nuk ka lënë pa diskutuar edhe kandidaten e PD-së për Durrësin, Grida Duma, duke u shprehur i habitur se përse mazhoranca po e sulmon kaq ashpër kohët e fundit.
“Po kjo puna e Gridës ç’është?” pyet Tom Doshi dhe gazetarët i përgjigjen: “PSja thotë që ka probleme me pronat, se ajo është edhe sharmante”, përgjigje me të cilën ishdeputeti i PSsë ka buzëqeshur.
Doshi ishte dje në Gjykatën e Lartë ku pas rivlerësimit të masës së sigurisë, ajo ju ndryshua nga arrest shtëpiak në “detyrim paraqitje”.
Redaksia Online
(JavaNews.al)
