Një muaj nga tërmeti i madh i 26 nëntorit, duket se lëkundjet e tokës nuk kanë përfunduar, pasi gjatë kësaj kohe janë shënuar 2.200 tërmete. Sizmologët thonë se aktiviteti sizmik është në zhvillim e sipër, ndërsa gjeografët shtojnë se sa më shpesh të ndodhin lëkundjet e lehta, aq më gradualisht çlirohet energjia.
Kur ka kaluar një muaj nga tërmeti i 26 nëntorit, toka duket se nuk ka gjetur qetësi, pasi lëkundjet vijojnë, ndonëse magnituda e tërmeteve ka qenë e vogël.
“Deri me sot kemi me tepër se 2200 ngjarje. Thyerja tektonike që ka gjeneruar lëvizjen sizmike nuk është stabilizuar ende, ka një moment qetësimi por nuk është çliruar e gjithë energjia”, thotë sizmologu Rexhep Koçi për A2 CNN.
Ndërkaq, sizmologët vijojnë matjet e lëkundjeve të tokës, ndërsa duket se magnituda e tërmeteve ka qenë në rënie, ndonëse numri i tyre është ende i lartë.
Sipas të dhënave në faqen zyrtare të IGJEUM, sot janë regjistruar katër lëkundje me epiqendra të ndryshme.
Lëkundja më e fundit ka qenë me epiqendër në Detin Adriatik në orën 7 e 20 të mëngjesit me magnitudë 3. Më herët janë regjistruar lëkundje në Derven me magnitudë 2.5, ne Peze e Vogel me magnitude 2 dhe ne Lagunen e Patokut me magnitude 2.5.
Vala e tërmeteve dhe pasgoditjeve sipas ekspertëve është normale me këtë magnitudë pas tërmetit të fortë e shkatërrues të 26 nëntorit që mori dhe të paktën 50 jetë njerëzish.
g.kosovari
