Tre persona u plagosën të shtunën pas një sulmi me thikë në një kolegj të arsimit të lartë në kryeqytetin polak, Varshavë.
Sipas autoriteteve, autori i dyshuar është një student 21-vjeçar, ndërsa viktimat janë dy vajza 17-vjeçare dhe një grua 24-vjeçare. Ngjarja u raportua rreth orës 12:30, kur policia mori njoftimin për një incident që përfshinte përdorimin e një arme të rrezikshme.
Zëdhënësi i policisë, Jakub Filipiak, bëri të ditur se një nga të plagosurit u dërgua në spital me lëndime që nuk rrezikonin jetën, ndërsa dy personat e tjerë nuk kishin nevojë për trajtim spitalor.
Sipas agjencisë shtetërore të lajmeve PAP, dy vajzat 17-vjeçare dhe gruaja 24-vjeçare kishin shkuar në kolegj për të dorëzuar dokumentet e regjistrimit. Raportohet se sulmuesi i dyshuar dhe të plagosurit nuk njiheshin me njëri-tjetrin.
Sulmi në Varshavë është i treti i raportuar brenda pak ditësh në Poloni. Të enjten, një ish-nxënës 15-vjeçar vrau një punonjës të pastrimit dhe plagosi dy mësues në një shkollë fillore në Leszczydol-Nowiny, në verilindje të Varshavës.
Të mërkurën një 19-vjeçar plagosi dhjetë persona, përfshirë veten, në një shkollë në Ostrołęka, në veri të kryeqytetit polak.
Pas incidenteve, autoritetet polake shtuan masat e sigurisë në institucionet arsimore. Sipas Reuters, mijëra efektivë policie vizituan shkolla në të gjithë vendin të premten, më 9 tetor, me synimin për të qetësuar nxënësit dhe stafin arsimor pas përhapjes së shqetësimeve për sulme të tjera të mundshme.
