Duket se kriza në transportin publik ka gjetur zgjidhje pas rënies dakord nga qeveria për subvencionin e naftës me 50 lekë edhe për disa muaj të tjerë.
Vendimi erdhi pas takimit të zhvilluar midis drejtuesve të transportit Urban dhe interurban me ministrat e infrastukturës dhe Ekonomisë.
“Paraprakisht, këtu u dakordësuam që të kenë një subvencion 50 ALL për litër për një periudhë katërmujore, siç është qershori, korriku, gushti dhe shtatori, sepse tani jemi gati në gjysmën e shtatorit dhe çmimi i karburantit është në rritje gjithnjë. Ne jemi në pritje të mbledhjes së qeverisë. Besoj se do të ketë një zbardhje të vendimit dhe një vazhdim të plotësimit të dokumenteve nga ana e operatorëve, për t’i paraqitur pranë Drejtorisë së Përgjithshme të Tatimeve dhe për t’u kompensuar në vlerën 50 ALL për liter”, tha kreu i shoqatës Dashnor Mema.
Sipas Memas, flota e mjeteve ka nisur me kapacitet të plotë pas takimit me ministrat e linjës.
“Dhënia e subvencionit dhe zgjatja e tij me një periudhë tre apo katër mujore na bën të ofrojmë një shërbim me kapacitet të plotë”, tha ai.
Ndërkaq, sipas Drejtorisë së Tatimeve fondi për kompensimin e parë të rritjes së çmimit të karburantit është realizuar në masën 100 %. Nga skema kanë përfituar 116 subjekte, me një vlerë totale kompensimi rreth 120 milionë lekësh.
